എന്റെ നിശബ്ദതയും നിന്റെ നിശ്വാസവും

എന്റെ നിശബ്ദതയും നിന്റെ നിശ്വാസവും 
നമ്മുടെ ജീവിതത്തിന്റെ കണക്കു പുസ്തകമാണ് 
ഏടുകൾ മറച്ചു നോക്കുന്പോൾ 
പലതും മായ്ച്ചു കളഞ്ഞതായി കാണാം 
പലതും വെട്ടി തിരുത്തിയതായും 

കീറിയ ഏടുകളും
മറന്ന പാടുകളും
ഓർക്കാൻ കരുതിയ ചെറിയ കുത്തിക്കുറിക്കലും
പഴമയുടെ മണം മാറാത്ത
ഈ കണക്കു പുസ്തകത്തിൽ
ആരെയും കാക്കാതെ
ആരോടും പറയാതെ
മറഞ്ഞു നിൽക്കുന്നുണ്ട്

ഓരോ തവണ തിരിച്ചു നോക്കുന്പോഴും
നഷ്ടബോധത്തിന്റെയും
തിരിച്ചറിവിന്റെയും
സന്തോഷത്തിന്റെയും
ഒരു പുഞ്ചിരി നമ്മുടെ ചുണ്ടിൽ വിരിയാറുണ്ട്
എന്റെ നിശബ്ദതയും നിന്റെ നിശ്വാസവും
നമ്മുടെ ഈ ജീവിതത്തിന്റെ കണക്കു പുസ്തകമാണ്