എവിടെയാണ് നാം പറഞ്ഞു നിർത്തിയത്

൧
പാതിയടഞ്ഞ വാതിലുകൾ അടക്കരുത്
ആരുമറിയാതെ കടന്നു വരുന്ന കാറ്റിനും
ആരോടും പറയാതെ പോകുന്ന മനസ്സിനും
ഒരരികു ചേർന്ന് പോകാനുള്ള ഇടമാണത് 
അതെങ്കിലും വെറുതെ വിടുക

൨
കാൽച്ചുവടുകൾക്കടിയിൽ
ഉണക്കിലകൾ ഞരങ്ങുന്പോൾ
ഇനിയുമുറങ്ങാൻ മറന്നു പോയ
നിഴലുകൾക്കരികിൽ
ഒരിലത്തണ്ടു മുറിച്ചിടുക
ഒരു നിശ്ശബ്ദതയവിടെ കിടക്കട്ടെ
നിഴലുകളുറങ്ങിക്കോട്ടേ

൩
വെളിച്ചമെന്നു പറയാനാകാത്ത
ഇരുളെന്നുറപ്പിക്കാനാകാത്തതുമായ
ഈ സന്ധ്യയിൽ
നിനക്ക് ശേഷം
ഞാനും ഈ വീടൊഴിയും
കാലത്തിന്റെ കൈപിടിച്ചു
നാമെന്നോ നടക്കാൻ പഠിച്ചതല്ലേ 

൪
എവിടെയാണ് നാം പറഞ്ഞു നിർത്തിയത്